Сапалы опа-далап таңдай білесіз бе?
Сапалы опа-далап таңдау кез-келгеніміз үшін оңайға соқпайды. Олардың түсі өзімізге жарасып қана қоймай, теріміздің ерекшілігіне сәйкес болуы шарт. Алайда ұмыт қалдыра алмайтын тағы бір талап – сапа мәселесі. Опа-далапты күнделікті қолданатындықтан, бұл ретте олардың сапасы жайлы сөз қозғауды жөн деп таптық.
Сурет: tvoirovaniemi.livejournal.com
Stan.kz опа-далаптың сапалы не сапасыз екенін анықтауға арналған кеңестер тізімін ұсынады.
Жалпы кеңестер
Кез-келген опа-далап таңдау барысында ең алдымен мыналарға назар аударғаныңыз жөн:
- Жарамдылық мерзімі
Кез-келген адам заттың жарамдылық мерзімін тексергенімен, ескеріле бермейтін жайлар бар.
- Егер өндіруші фирма тауардың 3 жылға дейінгі жарамдылық мерзімін көрсетсе, бұл оның құрамында қосындылар мен пайдасыз заттектер бар екенін аңғартады.
- Жалпы алғанда, сапалы опа-далаптың жарамдылық мерзімі 6 айдан аспайды.
- Құрамы
Сапалы құралдардың құрамында зиянды қосындылар емес, бензой қышқылы, сорбин қышқылы, Е дәрумені, жүзім сүйекшелерінің сығындысы, жожоба майы, алоэ вера сынды табиғи заттектер болуы тиіс. Мұндай косметкиалық тауарларды тоңазытқышта сақтаған дұрыс. Тиісінше, ол жайында опа-далап нұсқамасында міндетті түрде көрсетілуі шарт. Ал бірқатар косметикалық тауарлардың құрамында кездесетін мына заттардан бойыңызды алшақ ұстағаныңыз абзал:
- Техникалық май (Mineral Oil немесе Petrolatum) бөртпе мен безеу пайда болуына сеп болуы мүмкін.
- Пропилен гликоль себебінен ағзаның тітіркенуі орын алып, безеу пайда болуы мүмкін.
- Натрий лорел сульфаты. Сусабындар мен душқа арналған гельдерде кеңінен қолданылатын бұл зат – тері мен шаш күтімі үшін қауіпті. Ал жуғыш құрал ретіндегі әсері төмен.
- Глицерин теріні құрғатады.
- ANHYDROUS дезодоранттардың құрамында кездеседі.
- ВНА— теріні тітіркендіріп, эндокриндік жүйені бұзатын зат.
- FORMALDEHYDE тырнақ күтіміне арналған құралдардың құрамында жиі ұшырасады.
- PETROLEUM DISTILLATE. Ол реңк беруші кремдер, кірпікке арналған сүрме, ерін далабы, гигиеналық және парфюмериялық құралдардың құрамында кездесуі мүмкін.
- FD&CBLUE6, D&C GREEN 1, D&CRED 1, D&CRED 3, FD&CRED3, ACID BLUE 3, ACID YELLOW 3, CI 174160 — бала терісі үшін уытты заттар.
- Иісі
Сапалы опа-далаптың иісі бұрқырап тұрмайды. Ол – өнімнің құрамындағы заттардың табиғилығының белгісі.
- Тауарды өндіруші мемлекет
Опа-далап таңдауда тауарды өндіруші елдің климаты сіздің елдегіге ұқсас болуына мән беріңіз.
- Бағасы
Құралдың бағасы көп жағдайда ескерусіз қалып жатады. Көпшілікке арналған опа-далап үлкен таралыммен шығарылатындықтан, бағасы жоғары сапалы опа-далаптарға қарағанда анғұрлым төмен.
Белгілі бір опа-далап түрін таңдау
- Реңк беруші крем
Сурет: shutterstock.com
- Кремнің құрамы біртекті, ал иісі жағымды болуы тиіс.
- Сапалы кремнен еш уақытта аммиак не спирттің иісі шықпайды.
- Түсі біртегіс әрі өзгеріссіз болса, ол тауардың сапалылығын білдіреді. Көптеген танымал фирмалардың ғаламтордағы парақшаларында қолданушылардың пікірі мен кеңесі бар. Оларды бір шолып өткеніңіз артық етпейді.
- Опа
Сурет: shutterstock.com
Егер опа құрамында минералды заттар мен өсімдік сығындылары кездессе, ол терінің реңкін тегістеп, ісінулерді жасыруға көмектеседі. Оған қоса, теріні ылғалдандырып, пайдалы заттармен нәрлендіреді.
- Опа жағуға арналған жаққышпен опаны қолыңыздың терісіне жағып көріңіз: егер опа тегіс жағылса, сапалылығын аңғартады, ал үгіліп жатса, мұндай өнімнен бас тартқаныңыз жөн.
- Бетке арналған далап
Сурет: shutterstock.com
Сапалы далапқа қойылар талаптар:
- Біртегіс жағылып, жеңіл қараюы қажет.
- Үгілмеуі және айналасына жағылмауы тиіс.
- Бет кескінін түзетуге жарамды болуы керек.
- Ерін далабы
Сурет: shutterstock.com
Сапалы ерін далабын жаққанда мына жайлар орын алмайды:
- Ерінде ащылау дәм қалады.
- Ерін тартылып тұрғандай әсер пайда болып, терісі құрғап, жарылып кетеді.
- Далаптың беті суланып тұрады.
- Иісі өткір әрі жағымсыз.
- Далап өзегі сынғыш келеді.
- Қабаққа арналған бояу
Сурет: shutterstock.com
Қабаққа арналған бояудың сапасын анықтау үшін, бояу бетін саусағыңызбен жүргізсеңіз жеткілікті. Бұл ретте оның құрылымы құрғақ не крем тектес екенін ескеру қажет.
- Егер қабаққа арналған бояу құрылымы құрғақ болса, ол жұмсақ, тегіс әрі жібектей болуы керек. Ең бастысы, саусағыңызға жағылған бояу жан-жаққа шашылмауы тиіс.
- Кремді бояулар саусағыңыздың жылуында еріп, біртегіс жағылуы шарт.
- Кірпікке арналған сүрме
Сурет: shutterstock.com
- Сапалы сүрменің иісі болмайды не балауыздың әлсіз иісі шығып тұрады.
- Крем тектес құрылымы тым сұйық та, қою да болмайды.
- Сапалы сүрме көздің айналасына жағалмайды, үгілмейді әрі кірпітктерді бір-біріне жабыстырмайды. Қолыңыздың терісіне жаққанда біртегіс жағылып, сүрме қылқаламнан ақпайды.
- Қылқаламына келсек, тек берік әрі иілгіш талшықтардан не жоғары сапалы резинадан жасалғандары ғана сүрменің түйіршік қалдырмай, біртегіс жағылуына кепіл бола алады.
- Кірпік бояуға арналған сүрменің жарамдылық мерзімі 3 айдан аспайды.