Өз баласы да жарымжан: Астаналық әйел мүгедек балаларды тегін емдейтін орталық ашпақ

Астанада жарымжан балаларға тегін көмек көрсететін орталық жұмысын бастамай жатып, жабылу алдында тұр. Себебі мемлекет бөлген қаржы қайда тартсаң да жетпейді. Ал, төмен жалақыға жақсы мамандарды жалдау қиын. Өйткені кембағал бүлдіршіндерге логопедтен өзге де білікті мамандардың көмегі ауадай қажет. Сал ауруына ұшыраған балаларға арналған процедуралар удай қымбат.

Бұл туралы Еуразия бірінші арнасы хабарлайды.

Туғанынан арбаға таңылған балақай ауыр дертіне қарамастан 1-жасына дейін былдырлап сөйлейтін, дейді анасы. Алайда, оның ауруы дәрігерлерге барғаннан асқыныпты. Сөйлеуден қалған қыз қол-аяғын қимылдатуды да қойған. Анасы 7 жасқа келген Әдияның денсаулығына қатты алаңдайды.

«Бәрін ұмытып қалды.Ол біздің алған еміміздің әсерінен де болуы мүмкін.Нақты осы күнге дейін нақты диагноз қойған жоқ. Қазақстанда табылмаған нақты диагноз, түсініксіз жағдай болса, бәрін ДЦП деген диагнозға әкеп тығып қояды», – дейді қала тұрғыны Ләззат Нұрмаханова.

Бұндай дертке шалдыққан балаға ерекше күтім керек. Ал, ауруды емдеуге қыруар ақша қажет. Сондықтан «тегін қызмет көрсететін орталыққа зәруміз» дейді. Ал, 16-жастағы Алмас Кәрібаев та денесі құрысып қалатынын айтып, ата-анасына жиі шағымдананды екен. Сөйлеуі де қиын. Ал, оның аяқ-қолының жиі тартылып қалатындығы анасының жанына батады.

«Бізге логопедтік массаж міндетті түрде қажет. Оған әрдайым мамандарға ақша төлеп баруға қалтамыз көтермейді. Мына орталықтың ашылуын сарыла күтіп жүрміз. Маған баламның денсаулығынан маңызды ештеңе жоқ. Жылдар бойы қиналғанын көріп, әзер төзіп жүрмін. Ашығын айтқанда, бұл орталыққа ерекше үміт артып отырмын», – дейді қала тұрғыны Әсел Рыбинцева.

Ал, осындай орталықты құрып, кемтар балаларға көмек қолын созуға ниеттенген Салтанант Қалиеваның өз баласы да мүгедек екен. Сондықтан, “қолдан келгенше көмектесуге дайынмын” деп отыр. Алайда, 50 баланың бетін бері қарататын ұйымды қаражатпен қолдайтын мейірімді азаматтарға аса мұқтажбыз, дейді ол.

«Мекемені толыққанды ашу үшін қаражат жетпей жатыр. Себебі, түрлі буын ауруына шалдыққан балалардың денсаулығын қалпына келтіру үшін әртүрлі құралдар, ойыншықтар және арнайы қондырғылар сатып алдық. Әрі жиһазды да қарызға таптық.Сондықтан, бізге көмек қолын созатын жомарт жандар қажет», – дейді «Ерекше бала» қоғамдық қорының директоры Салтанат Қалиева.

Астанада сал ауруынан жапа шеккен балаларға көмектесетін орталыққа қаржылай қолдау қажет. Мекеме жұмыс істеуін жалғастырғанымен қарызға белшесінен батып отыр. Ал, қалалық әкімдіктің тарапынан мұндағы 50 баланың әрқайсысына 50 мың теңгеден ғана бөлінеді. Ал, бұл қаржы осында жұмыс істейтін қызметкерлердің жалақысы мен балалардың 4 уақыт ішетін тамағына ғана шығындалады. Ал, бүлдіршіндердің өзге қажеттіліктерін өтеуге ақша мүлдем жетпейді.

Ал, еліміздің бетке ұстарлары мүгедектерге қолдау көрсетуге әрдайым дайын екендерін айтты. Тіпті, биыл бұндай жандарға қолдау ретінде жарқын жоспарлар жасалып жатқанын да жасырмады.

«Біз кеше ғана әкімшілік-құқықтық заңға сәйкес біраз нәрселерді қарастырып жатырмыз. Бұл жерде ең басты мақсат осы саладағы, әсіресе мүгедектерге, реабилитациялық көмекті көрсету бойынша осыған байланысты қазір үлкен жоспар қойылып жатыр», – дейді ҚР Парламенті Мәжілісінің депутаты Бақтияр Мәкен.

Депутаттың сөзінше, жарымжан жандарға көмектесу басты міндет. Сондықтан, бұндай жағдайлар туралы хабарларды алған сәтте қолға аламыз -дейді ол.