Облыс әкімі: Қазақстандағы ең қауіпсіз аймақ – ОҚО
Бүгін ОҚО-да орталық коммуникациялар орталығында өткен баспасөз отырысында Бейбіт Атамқұлов журналистермен кездесті. Отырыстағы сөзін әкім «Ұлт жоспары-100 нақты қадамды дамытудың бес институционалды реформасынан» бастады.
Бұл туралы Отырар арнасы жазған.
Бейбіт Атамқұловтың сөзінше ОҚО-да басқа өңірлермен салыстыра қарағанда статистика бойынша қылмыс саны аз екен.
«Бұл жердегі халықтың көптігін есепке алу керек. Бізде 3 миллионға жуық тұрғын бар. Негізінде ОҚО ең қылмыс аз болатын өңірге жатады, сондықтан біздің облыс ең қауіпсіз болып есептелінеді»,-деді облыс басшысы.
Қазір облыс бойынша Сарыағаш ауданындағыдай қоғамдық еріктілер жасағы қолға алынбақшы.
«Сол жасақты құрып, керек-жарақпен қамтамасыз ету мақсатында 45 млн. теңге бөлінетін болады»,-деді Бейбіт Атамқұлов.
Сондай-ақ ол қазір ОҚО аудандарындағы барлық аймақтың «Қылмыс картасы» жасалынып жатқанын айтып өтті. Бұл алдағы уақытта қылмыстың алдын алып, болдырмауда пайдасы зор боларына облыс әкімі сенімді.