Маңғыстауда бірнеше компанияның мұнайшылары жалақыны өсіруді талап етті
Маңғыстауда бірнеше мұнай компаниясының қызметкері видео-үндеу түсіріп, әділдік сұрады, деп хабарлайды Stan.kz ақпарат агенттігі Lada.kz-ке сілтеме жасап.
Бүгін, 21 шілдеде желіде Жаңаөзендегі "Мұнай кәсіпшілігі жабдықтары және сервис" ЖШС және "Ақтау мұнай сервис компаниясы" ЖШС (ANSK), сондай-ақ Маңғыстау облысындағы басқа кен орындарының компаниялары қызметкерлері видео арқылы үндеу жасады.
Видеода жұмысшылар жалақыны жоғарлатуды және жұмыс орынында тамақтануды қамтамасыз етуді сұрады.
Тәуелсіздік күніне және мұнайшылар күніне орай жұмысшылар сыйақы және 13-ші жалақы берсін деген талап қойған.
Жұмысшылар бейнежазбада көптеген адамдар ресми келісімшартқа отырмағанын мәлімдеді.
Жаңөзенде де ереуілдер тоқтаған жоқ. Жалақының көтерілуін талап еткен ұжымдар саны көбейіп жатыр. Еңбекақының жоғарылауын сұрап бас көтергендердің кейбірі "бізді жұмыстан шығарып та жіберді" дейді. Десе де жұмысшылар айтқандарынан қайтпай, өз компания ғимараттарының алдына шатыр құрып наразылық білдіруін тоқтатпады.