Қытайлықтар Димаш Құдайберген жайлы фильм түсірмек

Қытайлық компания қазақстандық әнші Димаш Құдайберген жайлы фильм түсіруді жоспарлап отыр. Бұл туралы зиялы қауым өкілдері форумында Қазақ ұлттық өнер университетінің ректоры Айман Мұсақожаева айтып берді.

Бұл туралы Sputnik Қазақстанға сілтеме жасап Stan.kz ақпараттық агенттігі хабарлайды.

“Биыл біз “Еуразия” кинофестиваліне келетін BJ Brothers компаниясымен бірлесіп жұмыс істейтін боламыз. Аталған компания біздің Димаш Құдайберген жайлы фильм түсіруді жоспарлап отыр. Димаш туралы фильм түсіруге ұсыныстар көптеп түскен. Біз бұл туралы Канн фестивалі кезінде директорлармен ақылдасқан болатынмын”, – деді Мұсақожаева.

Әзірге фильмнің сюжеті, жанры, концепциясы жайлы ештеңе беймәлім. Айман Мұсақожаеваның айтуынша, оның анық-қанығы алдағы уақытта талқыланатын болады.

Бұдан бөлек, ректор Димаштың биыл ҚазҰӨА түлегі атанатынын айтты. Сондай-ақ, әншінің бітіру кешіне қатысатынын да сөз етті.

Айта кетейік, Астананың 20-жылдығына орай ұйымдастырылып жатқан халықаралық “Еуразия” кинофестивалі 1 мен 7 шілде аралығында өтеді. Оған француз актері Венсан Кассель, Канн кинофестивалінде үздік әйел бейнесі үшін жүлде алған Самал Еслямова, сербиялық кинорежиссер Эмир Кустурица мен басқа да танымал тұлғалар қатысады деп күтілуде.

Stan.kz сайтын Telegram арқылы оқыңыз. Арнамызға жазылыңыз.