ҚР Үкіметі дағдарысқа қарсы жоспар қабылдады
Жоспарда 10 жылға арналған мақсатты көрсеткіштер қарастырылған. Құжат Мемлекет басшысының Жолдауында аталған негізгі 5 бағыт бойынша 39 іс-шараны қамтиды.
Бұл туралы 24.kz сайты хабарлайды.
Ұлттық экономика министрі Досаевтың айтуынша, дағдарысқа қарсы жоспар 2 тараудан тұрады: жаңа құрылымдық экономиканы қалыптастыру және экономиканың өсуі мен несиелендіруді ынталандыру жөнінен жедел шаралар. Жаңа құрылымдық экономиканы қалыптастыру аясында қаржылық секторды тұрақтандыру, бюджет саясатын оңтайландыру, жекешелендіру мен экономикалық бәсекелестікті ынталандыру, жаңа инвестициялық саясат пен жаңа әлеуметтік саясат қарастырылады.
Жедел шаралардың негізгі бағыттарына мыналарды жатқызуға болады: экономиканың нақты секторын бөліктер бойынша қолдау, «Нұрлы жол» мембағдарламасы аясында негізгі инфрақұрылымдық жобаларды белсенді түрде іске асыру, ШОБ қолдау, тұрғын үйдің халық үшін қолжетімді болуын қамтамасыз ету, АӨК жобаларының іске асуын жеделдету, ЖИИДМБ жобаларын іске асыру, әлеуметтік тұрақтылық және жұмыспен қамтамасыз етуді қолдау. Дағдарысқа қарсы іс-шаралар туралы толығырақ салалық министрліктер мен Ұлттық банк басшысы баяндады.