Бейсенбі күні Петропавлда Азамат Нұрпейісовты жер қойнына тапсырды. Қайғылы митингті облыс әкімі Ерік Сұлтанов ашып, спортшының туыстары мен жақындарына қайғыра көңіл айтты.

“Талантты спортшы, жерлесіміз Азамат Нұрпейісов о дүниелік болды. Оны тек біздің ел ғана емес, бүкіл әлем таныды. Ол әркез адал, тәртіпті, жауапкершіл тұлға болды. Ол тек облыстың ғана емес, елдің де намысын қорғады. Өзінің ауруымен де соңғы сәтке дейін күресті. Оның жарқын бейнесі жүрегімізде сақталады”, – деді аймақ басшысы.

ҚР Ұлттық гвардиясының бас қолбасшысы генерал-лейтенант Руслан Жақсылықовтың атынан қоштасу сөзін ҚР Ұлттық гвардиясы әскери институтының жетекшісі полковник Жұмабек Ахметов сөйледі.

“Бұл орны толмас жоғалту. Мұндай есте қалатын әрі қысқа ғұмырды жазушы Сәбит Мұқанов “ағып өткен жұлдыздай” деп сипаттайды. Азамат алдына әркез биік мақсаттар қойып, соған қол жеткізетін. Оқуда да, спортта да керемет нәтиже көрсете алды. Ол көптеген курсанттар үшін жарқын үлгі еді. Азамат Ұлттық гвардия қатарындағы ең бір күрделі жол арнайы жасақты таңдап, қызмет еткен керемет офицер, өз ісінің білікті маманы болды”, – деді Ахметов.

Азамат Нұрпейісов соңғы сәтке дейін арнайы қызмет қатарында еңбек еткен. Ол ең жоғарғы марапат күрең беретке қол жеткізу үшін тынбай тер төгетін. Алайда бұл қадамына ауру кедергі болды.

“Арнайы тағайындау бөлімін дамытуға қосқан үлесі, әскери парызы, үлкен ұрыс қабілеті және рухты мінезі үшін ҚР Ұлттық гвардиясы бас қолбасшысының бұйрығымен Азамат Нұрпейісов көз жұмған соң, ерлік пен өрліктің белгісіндей, кәсібиліктің шыңы іспетті, адалдық пен жетістікті айқындайтын күрең беретпен марапатталды”, – деді баспасөз хатшысы Анна Пенькова.

Азамат Қызылжар ауданы, Бескөл ауылындағы мұсылман зиратына жерленді. Ол осы жылдың тамыз айында 28 жасқа толар еді. Оның артында әйелі мен екі жасар ұлы қалды.

Азамат Нұрпейісов бокс және кикбокспен мектеп кезінен бастап айналысқан. Оның мақсатына деген ұмтылысы аз уақыттың ішінде көптеген нәтижеге жетуіне көмегін тигізді. Ол халықаралық дәрежедегі спорт шебері атанып, Қазақстанның бірнеше дүркін чемпионы болды. Италиядағы әлем чемпионатының күміс жүлдегері (2009), Ирландиядағы әлем чемпионатының қола жүлдегері (2011), Азия чемпионы (2012), Түркиядағы әлем чемпионатының күміс жүлдегері (2013) атанды.

Азамат 2015 жылы тамыз айында ауырып ауруханаға түсті. Содан бері еріктілер тобы арнайы топ құрып, Азаматты қолдау үшін қаржы жинаған. Бұл акцияға олимпиада чемпионы Серік Сәпиев, облыс әкімі Ерік Сұлтановтар үн қосып, қаржы аударған. Алайда оның өмірі бар болғаны бір жылға созылып, 19 шілдеде бұл дүниемен қош айтысты.

“Азамат жеңілген жоқ, ол жеңді. Оны тек күшті ретінде еске алыңыздар. Ол әрқашан бізбен бірге”, – деді жары Альбина Нұрпейісова.

Талқылау