“Біз дәстүрлі түрде әр Олимпиада ойындарында алтынсыз қайтпайтынбыз. Үнемі спортшыларымызды әуежайдан қарсы алып, аспанға көтеретін едік. Осы жолы алтынға ие бола алмай, қола медальдарды місе тұттық. Барлығы алтын күткен еді. Мүмкін, жаттықтырушылар тобы мен жаттығу процесін жоспарлаған мамандар кейбір нәрселерді назардан тыс қалдырған шығар”, – дейді спорт шолушысы Азамат Ашимов.

Әртүрлі пікірлер бар. Олар спортшылардың шаршауынан бокс сияқты дәстүрлі спорт түрінен де бірінші орындарды алмадық дейді. Олардың пікірінше, спортшылар олимпиадаға әбден шаршап барған.

“Біз федерацияны спортты жақсы көретін адамдардың қолына беруіміз керек. Демеушілерге барып, спортшылардың мәселелерін шешіп, жүгіретін адам қажет. Бұл іспен әр спорттың ерекшелігі мен қажеттілігін білетін мамандар айналысқаны жөн. Ақордада отырып алып, жаттықтырушыларды жылына екі рет қана қабылдайтын адамның қажеті жоқ”, – дейді спорт шолушысы Данияр Кәріпжанов.

Спорт сарапшылары да, қоғам қайраткерлері де жүйелі өзгерістер қажет деп санайды. Халық үшін Олимпиадада жеңіске жетудің маңызы зор дейді мамандар.

“Олимпиаданың маңызы зор. Олимпиада ұлттық рухты көтеретіндіктен, жеңіс халықты біріктіреді. Путин мен басқа мемлекет басшыларының спортқа үлкен мән беруі тегін емес. Өйткені олар спорт – халықтың рухы екенін біледі”, – дейді қоғам қайраткері Мұхтар Тайжан.

Спорт сарапшылары бұл сәтсіз өткен Олимпиада ел басшылығының назарынан тыс қалмайтынына сенімді. Ең алдымен қорытынды шығарып, кадрлық өзгерістер жасалады деп күтуде.

Талқылау