Қазақ спортшыларының Риода қай күні жарысқа шығатыны белгілі бола бастады
Рио Олимпиадасының басталуына 24 күн қалды. Уақыт жақындаған сайын қай спорт түрінен жарыс қай күні өтетіні де белгілі бола бастады.
Сурет vesti.ru
Бұл туралы ҚазАқпарат хабарлайды.
Бүгін қазақстандық дзюдошылардың қай күні жарыс алаңына шығатыны белгілі болды. Біздің татами шеберлері алғашқы жарысын тамыздың 6-сы күні бастайды.
Естеріңізге сала кетейік, Бразилия төрінде ел намысын бес дзюдошымыз қорғайтын болады. Жарыс кестесі бойынша, жеңіл салмақта өнер көрсететін Елдос Сметов пен Галбадрах Отгонцэцэг 6 тамыз күні Астана уақытымен кешкі сағат 19:00-де татамиге шығады. 66 келі салмақ дәрежесі бойынша ерлер сынында Жансай Смағұлов 7 тамыз күні белдеседі. Әйелдер арасында екінші жолдаманы иеленген Мариан Ордабаева тамыздың оны күні сынға түспек. Ал Максим Раковтың өнеріне тамыз айының 11-і күні куә боламыз.
Айта кететіні, олимпиада ойындарының іріктеу кезеңдері 6-12 тамыз күндері аралығында әр салмақ бойынша Астана уақытымен 19:00-де, ал жартылай финал мен финалдық бәсекелер түнгі 00:30-да басталатын болады.
Оқи отырыңыздар:
Рио Олимпиадасының ресми әнұраны рэп-өлең болды
Қанат Ислам: Биыл біздің боксшылар Риода алтын медальдар саны жағынан тарихи рекорд жасайды
Риода ту ұстау үшін Руслан Жапаровтың не себепті таңдалғаны белгілі болды