Сергей Трофимовты таппай табандарынан таусылған Евгения мен Романның ендігі бар үміті құтқарушыларда. Себебі кешелі бері сегіз адамнан құралған топ оның күйеуін іздеуге шығыпты. Алайда Шхара тауына келгенде құтқарушылар екіге бөлініп кеткен. Яғни аяқ астынан өзге саяхатшыларға көмек керек болған екен. Сондықтан іздеу жұмыстары толыққанды жүргізілмепті. Оның үстіне ой-шатқалы көп тауда жүріп-тұру да қиын көрінеді.
«Таудан сәт сайын қар көшіп жатыр. Арнайы техника мен тиісті құрылғыларымыз да жоқ. Сондықтан жүрісіміз өнер емес. Құтқарушылардың көмегіне мұқтажбыз»,-дейді Трофимовтың әйелі Евгения Рябухина

Отандасымыздың жоғалғанына бүгін жиырма күн болды. Сергей саяхатқа аттанарда өзімен бірге камера, телефон және құжаттарын ала кеткен екен. Сондықтан бар үміт енді Грузияның байланыс компаниясында болып отыр. Яғни жоқ іздеген жандар Сергей Трофимовтың соңғы мәрте қайда болғанын анықтауға тырыспақшы.
«21-ші ғасырда технолгия дамыған заманда телефон арқылы адамның қайда болғанын анықтауға болады ғой. Бірақ әзірге байланыс операторы бізге ешқандай жауап бермей отыр»,-дейді Трофимовтың ДОСы Роман Борисович.

Сергейге іздеу салғандар алаяқтарға да тап болғандарын айтуда. Яғни күн сайын біреулер хабарласып құн сұрауға көшкен. Алайда саяхатшының туыстары барлық мәліметті жергілікті полицияға жолдап жатыр екен. Тіпті жергілікті билік пен елшіліктің енжарлығын айтып Елбасыға да хат жолдапты. Естеріңізге салайық Астаналық азамат 23-ші шілдеден бері іздестірілуде. Грузияға саяхаттап барған отандасымыз Ушгули шатқалына кетіп содан оралмаған.

Талқылау