Геннадий Головкин Қарағандыда мектеп оқушыларына тосын сый жасады (фото)
Қазақстандық боксер туған жеріндегі орта мектепке барып, балғындарға тосын сый жасады. Бұл туралы stan.kz сайты хабарлайды.
Генадий Головкин №76 Әлихан Бөкейханов атындағы орта мектепке күтпеген жерден бас сұққан. Ол білім ордасына құр қол келмепті. Бокс үйірмесінің қатысушыларына әлем чемпионы қолғаптар және басқа да керек-жарақтарды сыйға тартқан. Даңқты боксшы жас спортшыларға жетістікке жету үшін өз бапкерлерін мұқият тыңдауын және өздеріне сену керектігін айтты.
Головкин өзінің мектепке баратыны туралы журналистерге жария етпеген. Бұл туралы Ботабек Тілегенов фейсбуктағы парақшасында айтқан.
“Головкиннің мектепке келгенін маған бір мұғалім айтты. Ол маған сонда барып, суретке түсіруімді сұрады. Мен дереу мектепке жеттім. Ал ол жерде ешқандай БАҚ өкілі болған жоқ”, – деп жазды Тілегенов.
№76 мектеп Қарағандыдағы Головкин туып-өскен Майқұдық ауылында орналасқан. Ал боксшының өзі №65 мектепте білім алған.
Головкин бұдан бұрын Алматы мен Астанада болған еді. Спортшы жарнамалық келісімге қол қойған. Сондай-ақ, Астана қаласында өткен “Нұр Отан” партиясының кезектен тыс съезіне де қатысты.