Есей Жеңісұлы: Денистің қазасын матч алдында естідім, репортажда жүрегім май ішкендей кілкіді де отырды

Спорт комментаторы Есей Жеңісұлы Денис Тенді қайғыра еске алды.

Бұл туралы statsport.kz сайты жазады.

“Біздің әлем неге зұлым?.. Неге зұлымдық ізгілікті үнемі бөктеріп кете береді?..  Денис Тен қандықол қарақшылардың қолынан қаза тапты. Кімге қол жұмсап, халықтың қандай қазынасына қол сұғып жатқанын сол адам бейнесіндегі хайуандар сезінді дейсіз бе?

2014 жылғы Сочи олимпиадасында кіп-кішкентай Денис Тен қола тұғырға көтеріліп, Қазақстанды жүлдегер елдер санатына жалғыз өзі қосып еді. Қысқа бағдарламадан кейін 9-орында тұрып, еркін бағдарламада жүлдегерлер арасына атойлап кіріп еді сол жолы…

— Қысқа бағдарламадан кейін медальдан үміт іздің бе? Әлде «жүлдегерлер арасына сыналап кіремін әлі» деп өзіңді жігерлендірдің бе? – деген сұрағымызға:

— Мен тек қателеспей билеп шығуды ғана ойладым, — деп жымиып жауап беріп еді. Сол күні кешкісін Сочидің олимпиялық ауылында Дениске қола жүлде тапсырылғанда, айналамыздағы америкалықтар, ресейліктер, канадалықтар, басқа да көп елдің өкілдері бізді қызу құттықтаған-ды… Денистің арқасында дүниежүзілік аламанда біз шетте қалмап едік!

25 жыл деген не, тәйірі… Осы нағыз бұла шағында Денис Тен арда азаматтың ісін тындырып кетті. Жалт еткен жарық ғұмыр кенет сөнді.

Қайыр-қош, Денис бауыр! Сен мәңгі біздің жүрегіміздесің!

Денистің қазасын бүгін «Қайрат» — «Енгордани» матчын жүргізуге кетіп бара жатып естідім. 90 минуттық репортажда жүрегім май ішкендей кілкіді де отырды. Тағы бір жарық жұлдызымыз сөнді”, – дейді Есей Жеңісұлы.

Stan.kz сайтын Telegram арқылы оқыңыз. Арнамызға жазылыңыз.

Источник: Stan.kz

Если вы нашли ошибку в тексте, выделите ее мышью и нажмите Ctrl+Enter © stan.kz

Источник: Stan.kz

Орташа айырбас бағамы
17.08.18
Сатып алу
Сату үшін
USD
327
329.5
EUR
370
374
RUB
5.05
5.12
Соңғы жаңалықтар