Соңғы жаңалықтар
Соңғы жаңалықтар

Назарбаевтан кейінгі ең танымал адам: Баянды достары 45 жасымен қалай құттықтады (видео)

Отандық шоу-бизнестің басын қосқан Баян Мақсатқызының туған күн кеші ғаламторда қызу талқыға түсуде. 45 жасын ет-жақындарының жанында тойлаған продюсердің кешіне Stan.kz ақпараттық агенттігінің тілшісі де қатысып қайтқан еді.

Баянның меншікті мерекесі тосын-сыйларға толы болды. Мақсатқызы өзінің жұбайы Тұрсенге сезімге толы әнін тарту етсе, танымал кәсіпкер де туған күнге құр алақан келмеген. Алагөзов қонақтардың алдында ән салып, тіпті арнайы би қойылымын да дайындаған екен. Бір қызығы оның жоспарынан продюсер ханым бейхабар болған.

«Туған күндегі сценарий бойынша Тұрсен тек ортаға шығып ақ тілегін айтып, құттықтау керек еді. Ал оның ән айтқаны маған тосын-сый болды. Мен күткен жоқпын. Өйткені ол өмірде ешқашан ән айтып, билеген емес. Ондай өнері барын осы уақытқа дейін көрген де жоқпын. Маған өте қатты ұнады. Рахмет», – дейді продюсер.

Танымал продюсер, туған күнін тойлауды өктен жылдың соңында жоспарлап қойған екен. Қонақтардың барлығына бір ай бұрын шақыруды табыстаған. Баянның қуанышына ортақтасып келген меймандардың басым бөлігі – отандық шоу-бизнестің жарқын өкілдері.

Мәселен, Динара Сәтжан Астанадан арнайы ұшып келген. Құрбылардың таныстығы 2002-ші басталған екен. Сол уақыттан бері олар сырлас достарға айналған. Сондықтан болар, тележүргізушінің Мақсатқызына деген құрметі ерекше.

«Баян Қазақстанда президенттен кейінгі ең танымал адам. Баянның жан-дүниесі таза, әзілге жақын және достыққа адал. Баян Астанаға келгенде, біз таңғы 5-ке дейін шай ішіп ұйықтамай, әңгімелесеміз. Дос деген тек жақсылықта емес, қиын жағдайда да қолдау көрсету керек. Оған қиын кезеңдерде де қасында болдым. Баянды жамандайтындар да, мақтайтындар да бар. Бірақ Баянмен жақсы араластындар оның қандай адам екенін жақсы біледі. Баянның харизмасы бар және оның жақсы қасиеттері өте көп», – дейді Динара Сәтжан.

Бұл кешке келген меймандардың тізімінде – продюсер Алтынбек Рахметов те бар. Ол Баянмен осыдан 13 жыл бұрын телевизия саласында танысқанын айтады. Бүгінде айнымас досқа айналған Рахметов, туған күн иесінің ерекше қасиеттері мен кемшін тұстарын да жіпке тізіп берді.

«Баян таңертең ерте тұрмайтын адам. Оның таңы сол сағат 13:00-де басталады. Таңғы бағдарламада продюсер болып жұмыс істеп жүрген кезде, Баянды таңғы 7-де оятып, тікелей эфирге алып келген мен болғаннан кейін, содан бері дос болып кеттік. Біріншіден біз жақын доспыз. Сосын біз әріптес шығармыз. Ол достарды бөлмейтін ақ көңіл, қолы ашық және жарқын адам. Өміріндегі түрлі жағдайларға қарамай, өмірге деген құштарлығы биік», – дейді Алтынбек Рахметов.

Баянның туған күнінде «KeshYou» тобының жаңа құрамының тұсауы кесілді. Гелзбендке келген үш бұрымды продюсерлерінің қатал екенін аңғарған.

«Баян Мақсатқызы жұмысқа келгенде қаталдық танытады. Біз «KeshYou» тобына қабылданған кезде, үлкен қуаныш болды. Сондай-ақ қорқыныш пен қобалжу да болды. Себебі үміттерін ақтай аламыз ба деген сұрақ болды. Алайда, жарты жыл резервте болдық. Үлкен дайындықтан өттік десек те болады», – дейді «KeshYou» тобының жаңа құрамы.

Баян Мақсатқызы ұйымдастырған жұлдызды патиге «KeshYou» тобының экс-әншілері де келді.
«Шыны керек жаңа құрамды бүгін бірінші рет көрдік Жұлдыз екеуміз. Өте талантты қыздар. Еңбектерін халық бағалайды деп ойлаймын. 10 шақты әнді жанды дауыста айтып тастады. Оның үстіне билеп айту өте қиын.

Баян мен Бағым Мақсатқызының мектебінен өткен қыздар әрқашан мықты болады. Еңбекқор болады (күледі)», – дейді Ақбота Сейітмағамбет.

«Маған бұл құрам өте ұнады. Мен бұл қыздарды «KeshYou» тобына дейін де білемін. Мысалы, біреуі мен кішкентай кезде жүргізген «Айгөлек» бағдарламасына қатысқан. Ол кезде екеумізде кішкентаймыз. Қазір енді танып жатырмын. Екінші қызбен біз бір колледжде оқыдық. Қыздарға сәттілік тілеймін», – дейді «KeshYou» тобының экс-әншісі Назым Әбілдина.

Баян 2016-шы жылы болған жеке өміріндегі жайсыз жағдайдан кейін, шығармашылықтан алшақтағанын жасырмады. Бірақ алдағы уақытта олқылықтардың орнын толтыруға бекініп отыр. 45 жасқа аяқ басқан Алагөзованың өнер мен өмірде орындалмаған мақсаттары мен армандары әлі көп екен.

«Егер менің барлық арманым орындалды десем, бұл өмірдің мәні болмас еді. Бірақ 45 жылда азды-көпті көргенім мен айтарым бар, әрине. Мақтанатын сәттерім бар, қуаныш пен қайғы бар. Бұл өмірде сәттілік пен сәтсіздіктерді де көрдім. Ең бастысы қызықтың бәрі алда», – деп Баян Мақсатқызы сөзін түйіндеді.

 

 

Ескерту! Материалды көшіріп басуға қатаң түрде тыйым салынады!

Қазақстандық жұлдыздардың өмірі жайлы t.me/kzshow арнамыздан оқыңыздар.

Талқылау