Британияда әлемдегі ең жіңішке шолу мұнарасы салынды (фото)
Британиядағы Брайтон қаласында British Airways деп аталатын шолу алаңы пайда болды.
Бұл туралы nz1.ru хабарлайды.
162 метрлік мұнараның ерекшелігі сол, оның қақ ортасындағы дөңгелек алаңқай мұнара бойымен сырғып айналаны шолуға керемет мүмкіндік береді.
Жауын-шашынсыз, ашық күндері ол ең жоғарғы 138-ші метрге дейін көтеріліп, онда 20 минуттай тұрақтайды. Ал күңгірт тартқан күндерде тек 30 секунд ғана аялдайды.
200 адамды сыйдыра алатын шолу алаңы қаланың ғажап көрінісін биіктіктен тамашалауға мүмкіндік сыйлайды. Сондай-ақ, мұнда шыққандар Ла-Манш бұғазына да еркін көз тіге алады.
Гиннестік рекордтар кітабына кірген мұнараның құрылысы әлемдегі ең жіңішке мұнара ретінде саналған.
Құрылыс 12 жылдан астам уақытқа созылып, оған 61,5 млн доллар шығындалыпты. Қала билігі мұнара туристер үшін ерекше нысан болатындығына сенімді. Енді бұл жерде түрлі салтанатты іс-шаралар да өткізілмек.