Қазақстандық кәсіпкер боксшы Назым Қызайбайға үй салып берді
Қазақстандық кәсіпкер, меценат Бауыржан Оспанов бокстан әлем чемпионы Назым Қызайбайға үй салып берді. Бұл жөнінде спортшы əлеуметтік желідегі парақшасында жазған.
«Сәлеметсіздер ме менің құрметті инста оқырмандарым. Мен 2014 жылы бірінші рет Әлем чемпионатын ұтқанда Бауыржан Оспанов ағамыз маған көлік сыйлаған еді, ал 2016 жылы мамыр айында өзіміздің Астанада өткен Әлем чемпионатының жеңімпазы болып, Әлемнің екі дүркін чемпионы атанғанда маған және ата-ана, бауырларыма үлкен үй салып беремін деген еді. Міне, қазір сол үйге көшіп келдік. Осындай ағамызға барлық отбасымыздың атынан үлкен рахмет айтқым келіп отыр! Осындай Бауыржан ағамыздай, қазақтың спортқа деген барлық жағынан көмектесіп, көңіл бөліп жүрген ағаларымызға мың да бір рахмет! Аман болыңыз, Бауыржан аға!» – деп әлем чемпионы өз қуанышымен бөліскен.
Айта кету керек, спорт жанашыры Бауыржан Оспановқа Қанат Ислам да өз алғысын жаудырған болатын. Жəне меценат өзінің жерлестеріне де ерекше қамқорлығын жасауда. Қазір Алматы облысы Алакөл ауданы Жыланды ауылының халқына бар жағдай жасалған. Ауылда кинотеатр, спортзал, демалыс алаңы, тойхана сынды халық үшін аса қажетті ғимараттардың барлығын Бауыржан Оспанов жөндеп, ел игілігіне берді. Сондай-ақ аталған ауыл халқы ішімдіктен бас тартқан. Тұрғындарға қымыз күнделікті тегін таратылады. Оқушыларға сапалы білім беру мақсатында ауылға қаланың білікті мамандарын меценат өзі арнайы шақырып, оларға барлық жағдайды жасаған. Жаңа баспана салып, жалақыларын да бірнеше есе өсірген.
Жіберіп алмаңыз:
12 жасар Бибісара Асаубаева Ресейдің атынан шығып шахматтан әлем чемпионы атанды
Шетелдік БАҚ Жәнібек Әлімханұлына Головкиннің ізбасары деген баға берді
Допинг дауына іліккен спортшыларға қатысты министрлік мәлімдеме жасады
Қанат Ислам мықты қарсыласы Аллотейді жеңіп кәсіби рингтегі 22-жеңісіне жетті (видео)