Бақытбек Есентаев Баянның қансырап жатқанын 45 минут бойы бақылап тұрған
Оқиға орын алған 10 маусым күні Бақытбек Есентаев өзінің әйелін соққыға жығып, қатарынан төрт рет пышақ сұққаннан соң оны жанармай құю стансасы жанындағы көлікте ұзақ уақыт ұстаған.
Ол жедел жәрдем де шақырмаған. Ал Баян Есентаева қансыраған күйі күйеуінен өзін өлтірмеуін сұрап жалбарынған. Осылайша оқиға орнына олардың қыздары келіп жедел жәрдем шақырғанша 45 минут өткен. Бұл жайында «ҚазАқпарат» ақпарат агенттігінің Алматы облысындағы меншікті тілшісімен сұхбаттасқан қорғау органындағы дерек беруші сотқа дейінгі тергеу материалдарына сүйене отырып хабарлады.
«Әйелдер ер адамдарға қарағанда төзімді келеді. Мәселен, әйелдер 1,5 литрға дейін қан жоғалтып, кейін асықпай қалпына келтіре де алады. Ал ер азаматтар 0,5 литр қан жоғалтса есеңгіреп қалар еді», – дейді құқық жүйесінде ұзақ жылдар қызмет еткен дереккөз.
Оның айтуынша, Баян Есентаеваны аудандық ауруханаға жеткізгеннен соң оған 3 сағатқа жалғасқан ота жасалған. Жағдайы ауыр деп бағаланып, аппаратта бақылауда болды. Ал оның күйеуі Бақытбек Есентаев Талғар аудандық АІІБ жеткізілген.
Осы оқиға бойынша ҚР Қылмыстық кодексінің 106 «Адам денсаулығына ауыр жарақат салу» бабы бойынша қылмыстық іс қозғалып, сотқа дейінгі тергеуді Талғар АІІБ тергеу бөлімінің қызметкерлері жүргізді. Алайда, кейіннен іс Алматы облыстық ІІД арнайы тергеушілеріне берілген. Сонымен қатар, қылмыстық іс «кісі өлтіру үшін қастындық жасау» бабына ауыстырылған.
«Барлық тергеу жұмыстары жүргізілді. Бақытбек Есентаев жұбайымен бірнеше рет бетпе-бет кездескенде тіпті мың рет кешірім сұрауға мүмкіндігі болды. Ал БАҚ-та жазылып жатқанның басым бөлігі ойдан шығарылған», – дейді біздің әңгімелесушіміз.
Бұдан бөлек, Бақытбек Есентаевтың адвокаты Бекболат Жексейітов қазір оған тағылған «кісі өлтіру үшін қастандық жасау» туралы айыпты Қылмыстық кодекстің 106 бабына яғни әу бастағы «денсаулығына ауыр жарақат салу» бабына ауыстыру үшін барынша әрекет етуде.
Қазіргі күні тергеу аяқталды. Айыпталушыға ҚР Қылмыстық кодексінің 24 бабы 3 бөлімі арқылы 99 бабы 1 бөліміне, яғни «кісі өлтіру үшін қастандық жасау» бойынша айып тағылған. Қылмыстық іс Алматы облысының қылмыстық істер жөніндегі мамандандырылған сотына берілді. Сот процесі Қаскелең қаласындағы №2 сотта өтуі мүмкін.
Маусымның 10-ы күні Баян Есентаеваны күйеуі соққыға жығып, үш жерінен пышақтаған болатын. Артынша продюсерге 3 сағат бойы ота жасалып,күйеуі Бақытбек Есентаев қамауға алынған. Қайғылы оқиға Талғар ауданын трассасында болған. Продюсер маусымның 19-ы күні ауруханадан шығарылды.
Қазір Бақытбек Есентаев тергеу изоляторында. Оның әрекетіне қатысты сотқа дейінгі тексеру жұмыстары басталып кеткен. Оған “Өлтіруге әрекеттенді” деген қылмыстық кодекстің бабы негізінде айып тағылуда. 3 тамыз күні Баян Есентаеваның күйеуінің қамауда ұстау мерзімі тағы бір айға ұзартылған еді.
Жіберіп алмаңыз:
Адвокат Баян Есентаеваны күйеуінің неліктен аяусыз пышақтап тастағанын айтты
Баян Есентаева: Өзіме келдім, жақында қайта қауышамыз (видео)
Алматыға оралған Баян Есентаева қала шенеуніктерін сынады (видео)