Асылхан Төлепов жағдайы нашар отбасыдан шыққан балаларға көмек көрсетті (фото)
Актер Асылхан Төлепов мәслихат депутаты атанғалы оған жолданатын сауалдар легі жетерлік. Көпшілік кино жұлдызы депутаттық мінбеде ештеңе бітірмейді деп ойлайды екен. Жұрттың сөзінен мезі болған Асылхан өзін сынға алғандарға жауап берді, деп жазады Stan.kz тілшісі.
“Көп адам маған депутат болып не бітіріп жүрсің деген сұрақ қояды. Жасыратыны жоқ, тау қопарып, қыруар шаруа бітіріп жатырмын деп айтпаймын. Шүкір, қолға алып, аяғына дейін жеткізген шаруалар баршылық. Оқу жылы басталар бұрын Наурызбай ауданы “Нұр Отан” партиясының филиалында өткен азаматтық қабылдауға көпбалалы аналар келіп балаларын мектепке қамдауға жәрдем сұрады”, – дейді Асылхан.
Төлепов әдетте жасаған жақсылығын жария етуден бойын аулақ ұстайды. Естеріңізде болса, актер жігіт отбасын құрған күні той серуенінің орнына жетім балаларға көмек көрсеткен-ді. Асылхан мұны құпияда ұстауды жөн көргенімен, достары Асылханның жақсылығын жария етті.
“Әр отбасында кемі төрт баладан. Қазіргі бағалармен, әрине, баланы мектепке әзірлеу оңай емес.
Бір күнді белгілеп балақайларға арнайы автобус жалдап (үйлерінен алып кетіп, апарып тастады), түскі ас ішіп, киім-кешек, қажетті құралдар, аяқ қиім, спорттық киімдер алып бердім. Мен бұл бүлдіршіндердің сабақтарын жақсы оқып, ата-ана үмітін ақтайтынына сенемін”, – дейді депутат.
Посмотреть эту публикацию в Instagram
Асылхан мұны мақтаныш не болмаса абырой жинау үшін жария етпегенін атап өтті. Ол шын мәнінде мәслихат депутаттарының ешқандай да жалақы алмайтынын, соған қарамастан, қолдан келгенше халыққа көмектескісі келетінін айтты.
“Не бітіріп жүрсің?” деген сұрақтарыңызға жауап осы: қолымнан келгенше көмектесуге әзірмін… Атқарылып жатқан істің бәрін салсам, мақтаншақтық іспеттес болар”, – деген Төлепов өз ісін үнсіз атқаруды жөн санайтынын мәлімдеді.
Қазақстандық жұлдыздардың өмірі жайлы t.me/kzshow арнамыздан оқыңыздар.