22 сәуір күні Ақмешіт көшесіндегі жатақханалардың бірінің баспалдағының астында жаңа туылған нәресте табылды. Жедел жәрдем бригадасының қызметкерлері оны балалар ауруханасына жеткізді. Жынысы ер бала көрпешеге оралған күйінде табылды.Аталған факт сот алдындағы тергеудің бірыңғай тізілімінде ҚР ҚК-нің 119-бабы бойынша (“қауіпті жағдайда қалдыру”) тіркелді.

“Астана полицейлері жедел-іздеу шаралар кешенін өткізу барысында 22 сәуір күні Астана қаласының Ақмешіт көшесіндегі үй маңынан табылған нәрестенің анасы — Ақтөбеде акционерлік қоғамының бірінде жұмыс істейтін 21 жастағы тұрғыны екенін анықтады”,-делінген хабарламада.

Ведомствоның мәліметінше, тергеу іс-қимылдарының барысында полицейлер күдікті азаматшаның 4 сәуір күні Астанаға жұмыс бабымен келгенін анықтады. 22 сәуірде ол жалдамалы пәтерде нәрестені босанып, одан кейін баланы көрпешеге орап, үй жанындағы баспалдақтың астында қалдырып кеткен. Келесі күні ол Ақтөбе қаласына кетіп қалған.

Қазіргі кезде тергеу бөлімі ҚР ҚК-нің 119-бабы (“қауіпті жағдайда қалдыру”) бойынша сот алдындағы тергеу жүргізуде. Тергеу аясында қажетті сараптамалар тағайындалды. Тергеу амалдары жүргізіліп жатыр.

Еске сала кетейік, 22 сәуір күні Ақмешіт көшесіндегі жатақхана баспалдағының астында жаңа туған нәресте табылып, жедел жәрдем бригадасы оны балалар ауруханасына жеткізген еді.

Талқылау