Астанада үлескерлерді алдап кеткен тағы бір кәсіпкер тұтқындалды

Астанада шетінен тұтқындалып жатқан құрылыс компания басшылары тағы бір алаяқпен толықты. Бүгін полицейлер үлескерлерді алдап соққан атышулы Медет Бектеміровтың қолына кісен салды. Бұл туралы КТК телеарнасы хабарлады.

Сурет astana.gov.kz

37 жастағы кәсіпкер “Квартиры НС”, “Компания МС-7”, “Шаңырақ” деп аталатын құрылыс компанияларын құрып, «Араби 1», «Араби 2», «Самал» кешендерін салуға уәде еткен. Тіпті, аңғал адамдардың сеніміне кіріп миллиондап ақшасын да жинап алған.

Алайда, жарнамасы жер жарған баспананы сапасыз тұрғызып, қашып кетіпті. Негізі, кешенді салуға заңды рұқсаты да болмаған. Бір қызығы, суы, жарығы жоқ үйді қожайындары сатуға шығарып қойыпты. Ашынған үлескерлер енді изоляторға қамалған Бектеміровтен ақшаларын қайтаруды талап етпек.