Астана қаласына кіру ақылы болады

Астана қаласына таңертеңгілік уақытта кіру ақылы болуы мүмкін.

Бұл туралы «Елорда инфо» сайтына сілтеме жасап Stan.kz хабарлайды.

«Таңертеңгілік уақытта, яғни сағат 7-ден 9-ға дейінгі аралықта жүргізушілерден ақы алынуы мүмкін деп болжануда. Күндізгі уақытта  елордаға кіру үшін ақы төлеудің қажеті жоқ», – дейді Астана қаласы әкімінің бірінші орынбасары Сергей Хорошун.

Астана әкімінің орынбасарының сөзінше, мұндай шара таңертеңгілік уақытта көлік легінің жылдамдығын арттыру мақсатында жасалмақ. Ол осылайша жүргізушілердің жылдамдығын 15-20 пайызға арттыруға болатынына сенімді.  Ал аталған жобаны мемлекеттік-жеке меншік серіктестік аясында қаржыландыру жоспарлануда.

Сергей Хорошунның мәліметінше, еліміздің бас қаласына күн сайын орташа есеппен 82 мыңға жуық көлік кіріп-шығады. Олардың 17 пайызы, яғни 13 500-і қалаға таңертеңгілік уақытта кіреді екен.