Аргентиналық Хатико: стюардесса өзін алты ай бойы күткен итті асырап алды
Аргентинада қаңғыбас ит алты ай бойы стюардессаны күтумен болған. Стюардесса оны қонақ үйдің кіреберісінде тамақтандырып, басынан сипаған.
Бұл туралы t.journal.ru хабарлайды.
Германиялық стюардесса Оливия Зиверс Буэнос-Айрестегі іс-сапары барысында басынан өткен қызықты жайт туралы әңгімеледі. Күн сайын германиялық әйелді қонақ үйдің алдында белгісіз ит күтіп тұрған.
Ақырында ит Зиверстің артынан қалмайтын болған. Стюардесса қайда барса, соның артынан жүрген. Зиверс басқа қалаларға ұшып кеткен кезде ол бірнеше апта бойы қонақ үйдің алдында күткен.
Стюардесса қараусыз қалған жануардың иесін табуға тырысып, итті Буэнос-Айрестегі таныстарына тапсырған. Алайда ит ол жерден қашып кетіп, қонақ үйдің алдындағы сүйікті орнына қайта барған.
Жарты жылдан кейін Зиверс итті өзімен бірге алып кетуге бел байлады. Тіпті, жануарды Аргентинадан Германияға алып кетуге өтініш те жазды. Жануарды Рубио деп атаған әйел қазіргі таңда онымен бірге түскен суреттерін Facebook-тегі парақшасында жариялап жүр.