Алматыда еріктілер Мәуліт мерекесіне орай қала халқына тосын сый әзірледі

Алматыда Пайғамбарымызды (с.ғ.с) ұлықтаған ерекше шарапатты шара өткізілді. «Арбат» атауымен жақсы таныс Жібек жолы көшесі бойында «Алматы трилионерлер клубы» Facebook-бірлестігінің қатысушылары гүл таратты.

Роза гүліне Мұхаммед Пайғамбардың (с.ғ.с) хадисі жапсырылған:

«Қандай жағдай болмасын жақсы іс істеңіздер. Бұл сіздің кездескен, сұхбаттасқан адамыңыздың жүзіне күлкі жүгіртіп, көңіліне қуаныш сыйлайды».

Хадис мәтіні қазақ, орыс және ағылшын тілінде жазылған.

Ұйымдастырушылардың айтуынша, олар адамдарға Исламның сұлулығы мен бейбітсүйгіштігін көрсеткісі келген.

«Қазіргі таңдағы саяси оқиғалар негізінде қасиетті Ислам дінінен күйе жағылып жатқаны да жасырын емес. Аталған акция арқылы, Исламның ешқандай қантөгісті қаламайтынын, оның басты мәні адалдық, жұмсақтық, көркемдік екенін адамдарға ұғындыра түсуді мақсат еттік. Біз өз азаматтарымызды қуантып, оларға мерекелік көңіл-күй сыйлағымыз келді», – дейді акция ұйымдастырушысы Аида Найзабекова.

Алматы қалалық әкімдігінің рұқсатымен іске асырылған акция барысында жалпы саны 1000-нан астам роза гүлі сыйға тартылған. Мұндай ерекше шара шаһар тұрғындарының да көңілін көтерген.