Алматыда «Оңай» үшін таяқ жедім деген автобус жүргізушісінің өтірігі әшкере болды

Оңбай таяқ жеп, сол үшін «оңайлықтарды» айыптаған алматылық автобус жүргізушісінің өзі жауапқа тартылып жатыр, – деп хабарлайды КТК арнасының сайты.

Себебі, тергеушілер істі жүргізу барысында бұл оқиғаға қоғамдық көліктегі электрондық төлем жүйесінің еш қатысы жоғын, жанжалдың екі адам арасындағы жеке мәселеден туындағанын анықтаған.

Ал соққыға жыққан жігіт басқа емес, автобус жүргізушісінің туысқан інісі екен. Қалдыбек Байтанауов төрт жыл бұрын одан қарыз алып, төлемей кетіпті. Сол үшін Семейден арнайы келген туысы есесін жұдырықпен қайтарған.

Атышулы оқиға ақпан айында болды. 13-ші бағыттағы автобус жүргізушісі жұмыста жүріп оңбай таяқ жеп, мұнысын «Оңай» төлем жүйесімен байланыстырған. Ақша төлеуден бас тартқан жолаушы, бас салып ұрды деген еді сол кезде Қалдыбай Байтанауов.

“Мына «Оңайды» қойып, «Оңайдан» мүгедек болдым ғой. «Оңай» болмағанда емін-еркін төлеп жүре бергенбіз. Қазір «бардак» болды мына «Оңайды» қойғалы”, – дейді автобус жүргізушісі Қалдыбек Байтанауов.

Байтанауов тіпті Алматы көлік холдингінен 5 миллион теңге өтемақы талап етпек болғаны да есте. Алайда тергеушілер істің ақ-қарасын анықтаған соң, әңгіме бастан-аяқ өзгеріп кетті. Сөйтсе, соққыға жыққан өзге емес, өз туғаны екен. Ал өзара жанжалға осыдан 4 жыл бұрын алған 10 мың доллар қарызы себеп болған.

“Содан бері міне, 4 жыл бойы 45 мың теңгеден ақша жіберіп тұрдым. Содан бастап мына биылғы қыркүйектен бастап кішкене ақша бере алмай қалдым. Бұл інімді енді бәрібір соттатқанда маған ұят болды ғой. Ел-жұртымнан, жақынымнан ұят. Сонан кейін айттым да”, – дейді жүргізуші.

Неліктен жалған жауап бердіңіз деген сұраққа жүргізуші осылай жауап берді.

Ағайынымен бас араздығын елге жария қылғысы келмеген жүргізушінің өзі де жауапкершілікке тартылуы мүмкін.

“Тергеушілер екі азаматтың да іс-әрекетеріне ресми түрде құқықтық тұрғыда баға беруде. Яғни, жалған ақпаратты беру де өзі қылмыс болып табылады”, – дейді Алматы қаласы ІІД ресми өкілі Салтанат Әзірбек.