Алматыда көпқабатты тұрғын үйде өрт болып, 37 адам қауіпсіз жерге көшірілді
Алматыда көпқабатты тұрғын үйде болған өрт кезінде 37 адам қауіпсіз жерге шығарылды. Бұл туралы ҚазАқпарат тілшісіне ТЖД-нің ресми өкілі Сандуғаш Баймұхамбетова мәлімдеді.
“Сағат 09:42-де “101” нөміріне қоңырау шалынып, Бостандық ауданындағы Тимирязев көшесі, 99/1 мекенжайындағы пәтер өртеніп жатқаны туралы хабарланды. Бірінші бөлімше шақыру орнына төрт минуттан кейін жетті. Газ-ауа қоспасының жарылуы салдарынан тұрғын үйдің төртінші қабатындағы пәтерде өрт орын алды”, – деп хабарлады Сандуғаш Баймұхамбетова.
Оның айтуынша, өрт сөндірушілер адамдарды қауіпсіз жерге шығару шешімін қабылдап, 37 адам, соның ішінде 13 бала эвакуацияланған. Жалын сағат 10:10-да сөндірілген.
«Тілсіз жаумен күресте жеке құрамның 35 адамы, 6 негізгі және 4 арнайы техника жұмылдырылған. Жалын 20 шаршы метр аумақты шарпыған. Пәтер иесін күйіктер шалып, ол ауруханаға жеткізілді», – деп түйіндеді ТЖД-нің өкілі.
Талқылау