Алматыда қоғамдық көлікте тегін жүру құқығына ие тұрғындардың жаңа санаты белгіленді
Алматыда жеңілдікке ие тұрғындардың жаңа санатына қоғамдық көлікте тегін жүру құқығы берілді. Бұл туралы бүгін «Алматы қаласының Көлік Холдингі« ЖШС баспасөз қызметінен хабарлады.
Бұл туралы ҚазАқпарат хабарлайды.
Алматы қаласының аудандық жұмыспен қамту және әлеуметтік бағдарламалар бөлімдерінде жеңілдікке ие тұрғындардың жаңа санатына «ОҢАЙ» картасын алуға өтінімдер қабылдана бастады.
«Тегін жүру құқығы Ұлы Отан соғысы ардагерлеріне теңестірілген тұлғаларға, 1-ші және 2-ші топтағы мүгедектерге және 18 жасқа дейінгі мүгедек жандарға беріледі. Сондай-ақ, 18 жасқа дейінгі 4 және одан да көп балалары бар аналар айлық жол жүру билетін 50 пайыздық жеңілдікпен ала алады», – делінген хабарламада.
Жеңілдетілген «ОҢАЙ» көлік картасына өтінімдер тұрғындардың тұрғылықты мекенжайы бойынша аудандық жұмыспен қамту және әлеуметтік бағдарламалар бөлімдерінде қабылданады.
Бұл үшін жеке куәлік пен жеңілдік алуға құқығы бар екендігін растайтын құжат қажет.