Айта кетсек, бұл жаға ұстатар жағдай былтыр көктемде әшкереленген. Тергеу мәліметтеріне қарағанда, акушер-дәрігерлер бастаған қылмыстық топ 8 жыл ішінде 15 бала сатқан.

Тірі жанды тауар қылғандардың ісі ақыры сотқа жетті. Бүгін сот алдында Алматы облыстық көпсалалы ауруханасының бұрынғы қызметкерлерімен қатар сәбиді ақшаға сатып алғандар да жауап беріп жатыр. Жалпы саны 32 адам. Бүгін алдын-ала тыңдауға сотталушылардың бәрі бір-бір адвокатпен келді. Дегенмен істің өзі жабық қаралып жатыр.

“Алдын-ала сот тергеуі өтуімен осы бас сот талқылауы қай күнге тағайындалатыны шешіледі. Алдын-ала сот тергеуі жабық сот мәжілісінде қаралады. Сол себептен, журналистер сотқа жіберуге болмайды“, – дейді Алматы қаласы Кәмелет жасына толмағандардың ісі бойынша мамандандырылған ауданаралық сотының төрағасы Жеңіс Кәрібаев

Сотқа келген ақ халаттылар бет-жүздерін барынша жасырып әлек. Тергеу мәліметтеріне қарағанда, бұл топ жылмысқы әрекеттерін 8 жыл бойы жалғастырыпты. Осы уақыт аралығында 15 нәресте сатылып кеткен. Әрқайсының бағасы 150 мың теңгеден 6 мың долларға дейін бағаланған. Клиенттер негізінен перзент сүюге зар болып жүрген отбасылар. Мәселен, Гүлмира Сауытова шекесі торсықтай ұлды 4 жарым мың долларға сатып алған. Өз кінәсін мойындаған әйел енді туғанындай көріп кеткен баласынан айырылып қалуы да мүмкін.

“Доллар ауыстырған кезде мен машинада отырдым. Бала алған кезде де қасында болдым.Өзім асырап жатырмын баланы, өзімнің туған баламдай болып кетті”, – дейді Гүлмира Сауытова

Перзентхана қызметкерлері негізінен некесіз босанған жас аналарды алдап, өз баласынан бас тартуға итермелеген. Бірақ сәбиінің саудаға түсетінін босанған келіншектердің ешқайсысы білмеген көрінеді. Айсара Бекжанова ақ халаттыларға алданғандардың бірі. Бауыр еті баласын дер кезінде қайтып алса да, қазір айыпталушылар қатарында.

“Қазіргі кезде баласы өзінде, бірақ баланың құжаттары басқа кісінің атына шығарып қойған. Алдында ондай әңгіме болды дейді, бірақ мен оған келіскен жоқпын дейді. Азаматтық некедегі күйеуі де, өзі де айтады. Біз қатты алдандық дейді. Сол алданғандықтан қазір осындай жағдайға душар болдық деп айтып отыр”, – дейді айыпталушы Айсара Бекжанованың адвокаты Әбдіхайым Саматаев.

Жаға ұстатарлық жағдайға қатысты іс Қылмыстық кодекстің бірнеше бабы бойынша қозғалған. Сотқа келіп түскен тергеу құжаттарының өзі 45 томды құрайды. Айта кетсек, айыпталушылар қазір қолхатпен және мүліктерін кепілге қойып бостандықта жүр. Ал туыла салып тірі тауарға айналғандар қазір сатып алған ата-аналарының қолында. Дегенмен, олар сот шешімі бойынша балалар үйіне тапсырылуы мүмкін.

Талқылау