Жамбыл атындағы Қазақ мемлекеттік филармониясында өткен қаралы жиынға Меңтай ағаның туған-туыстары, өнердегі бірге істескен әріптестері, үзеңгілес достары, кино және театр актерлері, Алматы қаласы әкімдігінің өкілдері, өнер қайраткерлері және қала тұрғындары келіп, марқұмның отбасына көңіл айтып, қайғыларына ортақтасты.

Қаралы жиынды жүргізген ҚР еңбек сіңірген мәдениет қайраткері, актер Болат Әбділманов алдымен ҚР Қорғаныс министрі Иманғали Тасмағамбетовтың жіберген жедел хатын оқыды.

«Меңтай Смағұлұлы Өтепбергенов өзінің бүкіл саналы ғұмырын қазақ өнеріне арнаған біртуар жан еді. Ол өзінің қажырлы еңбегімен, талантымен кино өнерінің шырқау биігіне көтерілді, жарық жұлдызына айналды. Ұлттық кино өнеріне өлшеусіз үлес қосып, ел руханиятын еселеу жолында тынбай еңбек етті. Оның өмірі мен өнері барша жамағатқа, тұтастай ұрпаққа үлгі», – делінген жеделхатта.

Бұдан кейін сөз алған Алматы қаласы әкімінің орынбасары Арман Қырықбаев қала әкімі Бауыржан Байбектің атынан марқұмның отбасына көңіл айтты.

Сонымен қатар, қаралы жиын барысында белгілі кино режиссер Еркін Рақышев Меңтай ағаның фильмдерде көбінесе жағымсыз кейіпкерлерді сомдағанымен өмірде жаны жайсаң, көңілі кең адам болғандығын есіне алды.

«Меңтай аға қазақтың кино өнеріндегі шоқтығы биік жұлдыздардың бірі болды. Кинода көбінесе жағымсыз кейіпкерлерді сомдады. Өте шынайы сомдайтыны соншалық, шынымен сеніп қалатынсың. «Апырай, неткен түсі суық, неткен қатыгез адам!» – деп ойлайсың. Ал өмірде ол кісі жаны жайсаң, бір керемет адам болатын. Ол менің «Айша» деген фильмімде де жағымсыз кейіпкерді ойнады. Сонда жақын таныстық. Сонда оның нағыз қазақи мінезді, көңілі кең, шуақты адам екенін көріп тәнті болдым. Керемет қалжыңдасатын. Шынын айту керек, Меңтай аға өзінің деңгейіне лайық атақ-дәреже ала алмай кетті. «Бір жақсы рөлдерді сомдасам» деген армандары бар еді. Амал қанша, асыл ағамыздан айрылып отырмыз. Жаны жәннатта болсын. Оның жасамаған жасын, артындағы ұрпақтары жасасын», – деді Е. Рақышев.

Талқылау