Самғат Мақсатұлы бір көзінен Қапшағайдағы осы түнгі клубтың алдында айырылған. 2 жыл бұрын болған қырғында сол жақ жанарына оқ тиіпті. Содан бері дәрігер жағалап жүр. Бірақ, әдейі көздеп атылған оқты алу мүмкін болмаған екен. Өмір бойына мүгедек болып қалған ол төбелескен екеуді ажыратамын деп, опық жегенін айтады.

“Көздеп, бұрылып, көрді менің арттан келе жатқанымды. Бұрылды да артына қарап, мені атып түсірді ғой. Мен осы жерде құладым, дос балаларым келді. Жаңағы бала қашты бірден”, – дейді ол.

Қару кезенген Қапшағай қалалық Мәслихты депутатының ұлы екен. Травматикалық тапаншадан 4 рет оқ атыпты. Артынша, қашып кетіп, 2 жыл бойы халықаралық іздеуде жүріпті. Тек ай бұрын Айбек Нұржанов қайта оралған. Бірақ, түнгі клубтан шыққан атысқа қатысты іс әлі сотқа жіберілмей, созылып жатыр. Ал, күдіктінің өзі кепілмен бостандықта жүр.

“Келерін келіп алды да, менің балама «сол кездері атып, өлтіріп кетсем болар еді» – дейді екен. Мен ешқандай ештеңе көріп отырған жоқпын. Не іс қозғалып жүріп те жатқан жоқ. Ешқандай әділеттілік көріп отырғам жоқ мен. Әкесі депутат болғаннан кейін, бұл қозғалтпай отыр ғой істі”, – дейді жәбірленушінің әкесі Мақсат Қошмағамбетов.

Бірақ депутаттың өзі мұның бәрін жоққа шығарды. Айтуынша, көзінен айрылған жәбірленушінің өзіне де, отбасына да қыруар жәрдем берген. Ал, Самғатқа оқты баласының атпағанына бірнеше дәлелдері бар екен.

“Олар арызын ақша алу үшін жазады. Ақша алып болғасын, қайтадан қайтып алады. Сондай адамдар. Екі-үш рет жазған, «атты», «атқан жоқ” деп”, – дейді Қапшағай қалалық Мәслихатының депутаты Серікбай Нұржанов.

Депутат тіпті оқтың бірі ұлына тигенін айтып отыр. Бірақ тергеуде бұл мәлімет айтылмады дейді. Ал облыстық ішкі істер департаментіндегілер шиеленіскен істің жақын арада прокуратураға, кейін сотқа жолданатынын мәлімдеді. Дегенмен, көзінен айырылған жігіт құрығы ұзын депутатты сотта жеңетініне сенбейді.

Талқылау