Алматы әкімі Назым Қызайбайға 1 миллион теңге мен автокөлік сыйлады
Алматы қаласының әкімі Бауыржан Байбек бокстан әйелдер арасында екі дүркін әлем чемпионы атанған алматылық Назым Қызайбайды құттықтады.
Дәстүрлі велошеруден кейін әкім әлем чемпионын Астанада қол жеткізген жетістігімен құттықтап, оған көлік кілтін табыстады. Бұл туралы Фейсбук парақшасында әкімдік баспасөз қызметінің қызметкері Еркебұлан Кенжеболатов хабарлады.
Сондай-ақ, спортшыға 1 миллион теңгенің сертификаты мен қаладағы танымао фитнес-клубтардың біріне жылдық тегін абонемент берілді. Ал оның жеке бапкері Жұмабек Өмірзақовқа да миллион теңге табыс етілді.
Бұған дейін де Назым Қызайбайды бірінші мәрте әлем чемпионы атанған сәтте, сол кездегі қала әкімі Ахметжан Есімов те құттықтаған. Бірақ, әкім боксшыға небәрі велосипед ғана сатып алуға жететін қаражат бергені мәлім болған еді.
Спортшы өз мансабында екі мәрте әлем чемпионы деген атақты ұтып алды. Бірақ, Астанадағы әлем чемпионатында 48 келіде өнер көрсетуі себепті Риодағы олимпиада ойындарына жолдама ала алған жоқ.