Әлемдегі ең шымыр денелі әже 80 жасқа толды (фото)
Әрбір адам өзі таңдаған салаға мойын бұрып, жаңа өмір бастай алады. Бірақ, ол үшін әрине үлкен тәуекел керек. Бұл ретте АҚШ-тағы Балтимор тұрғыны Эрнестина Шепард әжейді айтуға болады.
Ол әлемдегі ең қарт бодибилдер әйел. 80 жасқа толған кейуана әлі күнге марафон мен жарыстарға тұрақты түрде қатысады. Оның көркем шымыр денесіне тіпті 20-дағы жастар да қызығуы мүмкін.
Эрнестинаның айтуынша, ол өмірінің басым бөлігінде аз қозғалып, физикалық жаттығуларға аса құлықты болмаған. Ол тек өз өмірін ретке келтіруде 56 жасында әпкесімен бірге бастаған.
Ол екеуі бірге аэробикамен айналысып, түрлі шараларға қатыса бастаған. 2010 жылы ол әлемдегі ең кәрі бодибилдер әйел ретінде Гиннестің рекордтар кітабына кірген.
Рекордшы әйел әр күн сайын таңғы 3-те оянып, жаттығулар жасап, жүгірумен айналысқан. Сағат 8-де жекелеген жаттығулар жасап, кешкі 10-нан кешікпей ұйқыға бас қойған. Оның тамақтану режиміне күріш, тауық еті, грек жаңғағы, жұмыртқа және үлкен көлемде су кіреді.
Эрнестина кез-келген жаста өмірін өзгертіп, жаңа белес бағындыруға болатынын дәлелдеген жан.