Әділбек Ниязымбетов әзербайжан боксшысын жеңіп, жартылай финалға шықты
Рио-де-Жанейрода өтіп жатқан ХХХІ Олимпиада ойындарында бокстан 81 келі салмақта өнер көрсеткен Әділбек Ниязымбетов әзербайжандық Теймур Мамедовты айқын басымдықпен жеңді.
Бұл туралы bnews.kz хабарлайды.
Бірінші раундтан-ақ Әділбек қарсыласынан басым түсті. Екінші раундта Теймур Мамедов жиі шабуыл жасауға тырысты. Алайда қазақ бокшысы сауатты қорғана білді. Соңғы шешуші раундта Әділбек Ниязымбетов ширақ қималдап, жеңісті қолдан берген жоқ. Есеп 3:0. Қазақ боксшысы келесі кезеңге жолдама алды
Енді Әділбек Ниязымбетов жартылай финалда ұлыбританиялық Джошуа Буатсимен қолғап түйістіреді. Қос қарсылас арасындағы бәсеке 17 тамызда Астана уақытымен түнгі 03:30-да басталады.
Айта кетейік, Теймур Мамедовтың анасы қазақ қызы. Шымкентте дүниеге келген. Бұл боксшы бұған дейін Лондон Олимпиадасында қола жүлдегер атанған. Сондай-ақ, екі рет әлем біріншілігінде медаль иеленген. Еуропа ойындарының чемпионы.
Әділбек бұған дейін 1/8 финалда беларусь боксшысы Михаил Долголевецты оңай жеңген болатын.
Естеріңізге сала кетейік, боксшыларымыз биыл алғаш рет Олимпиадаға толық құрамда барған болатын. Кеше 91 келідегі Василий Левит финалға шықты. Сондай-ақ Қайрат Ералиев, Біржан Жақыпов, Берік Әбдірахманов, Абылайхан Жүсіпов жарыс жолынан шығып қалды.