“Әділ сөз”: Сейітқазы Матаев ауруханаға түсті

Қазақстан журналистер одағының төрағасы, Ұлттық баспасөз клубының жетекшісі, "мемлекет қаржысын жымқырды" деген күдікпен үйқамақта отырған Сейітқазы Матаев қан қысымы күрт артып ауруханаға түсті,-деп хабарлайды Азаттық радиосы.

Бұл жөнінде бүгін Қазақстан бас прокуроры Асхат  Дауылбаевқа жолдаған үндеуінде "Әділ сөз" халықаралық сөз бостандығын қорғау ұйымының президенті Тамара Калеева мәлімдеген. Сейітқазы Матаевты 22 ақпанда Алматыда ұлттық коррупцияға қарсы іс-қимыл бюросының Алматы қаласы бойынша департаменті "бюджет қаржысын жымқырды" және "салық төлеуден жалтарды" деген күдікпен ұстаған. 24 ақпанда сот оны үйқамаққа алу шешімін шығарған. Калеева үндеуінде коррупцияға қарсы іс-қимыл бюросын Матаевқа қатысты "кінәсіздік презумпциясын бұзып", сот үкімі шықпастан оны "айыпты деп таныды" дейді. Бұған қоса ол прокоррупцияға қарсы іс-қимыл бюросы басшылығын прокурордың рұқсатынсыз Матаевқа қатысты сот тергеуі мәліметін жариялап жіберді дейді. "Әділ сөз" жетекшісі осыған байланысты Матаевтың ісін тергеу талаптары бұзылып жатыр деп, істі прокуратураның тергегенін сұрайды. Бұған дейін Матаевтың "мемлекет ақшасын қымқырды" деген күдікке ілінгені жайлы жазған еді. Сондай-ақ журналистер одағының төрағасы өзіне тағылған айыпты жала деген болатын.