"Ақпараттық қауіпсіздікке қатысты интернеттің қазақстандық сегментіне мониторинг жүргізу кезінде, "Мемлекеттік техникалық қызмет" АҚ-ның KZ-CERT компьютерлік инциденттеріне жауап беру қызметі "Телеграм" арналарының бірінде "Телеграм" қолданушыларының жеке деректерінің 744 мың жазбалары бар файл тапты. Талдау нәтижесінде табылған файлда пайдаланушының идентификаторы, аты, тегі, телефон нөмірі және "өзім туралы" бағанынан пайдаланушының сипаттамасы сияқты жеке деректер бар екендігі анықталды", – деп хабарлады KZ-CERT АҚ "Мемлекеттік техникалық қызмет" АҚ баспасөз қызметі.

Атаулы Tелеграм каналының авторы табылған файлды ТМД-дағы ең үлкен қызмет (1 миллионнан астам пайдаланушы), "Глаз Бога" платформасының клиенттік базасы ретінде сипаттайды. Бұл платформа сұрау салу бойынша пайдаланушылардың жеке мәліметтерін алуға мүмкіндік беретін әлеуметтік желілерден, жедел хабарламалардан, іздеу жүйелерінен және басқа да көздерден алынған ақпарат негіздері.

Мемлекеттік техникалық қызмет мамандары түсіндіргендей, бұл жеке мәліметтердің шығуы киберқылмыскерлердің ақпаратты әлеуметтік инженерия саласында пайдалану кезінде үлкен тәуекелдерді тудырады, атап айтқанда, жеке және банктік деректерді алу үшін қоңырау шалу және хабарлама жіберу кезінде.

"Осыған байланысты біз интернеттің қазақстандық сегментінің барлық қолданушыларына кибер гигиенасын сақтаудың маңыздылығы туралы ескертеміз, сонымен қатар интернетке жеке деректеріңізді енгізген кезде қырағылық танытып, жеке ақпаратты үшінші тұлғаларға бермеуді сұраймыз”, – деді "Мемлекеттік техникалық қызмет" KZ-CERT АҚ-ның баспасөз қызметі.

Талқылау